24-nji noýabrda irden Sinsinnatidäki “Ti-Kýu-El Stedium” stadionynda MLS Kubogynyň pleý-offunyň 1/4 finalynyň “Sinsinnati” bilen “Inter Maýaminiň” arasyndaky duşuşygy geçirildi. Oýun “Inter Maýaminiň” 4:0 hasabynda utmagy bilen tamamlandy.
Ýeňijileriň düzüminde üç argentinaly oýunçy – Lionel Messi (19-njy minutda kelle urgusy), Mateo Silwetti (57) we Tadeo Alýende (iki gol, 62 we 74) tapawutlandy. Şeýle-de, Messi üç assist etdi.
“Inter Maýaminiň” soňky alty oýnunda Messi 11 gol geçirdi. Pleý-offy goşmak bilen, häzirki möwsümde onuň hasabynda 32 oýunda 35 gol we 17 assist bar.
Bu oýun Messi üçin aýratyn boldy: ol futbol taryhynda ilkinji bolup 1300 gol+assist belligine ýetdi. Mundan başga-da, argentinalynyň hasabynda indi karýerasynyň dowamynda 404 assist bar – bu görkeziji boýunça ol Ferens Puşkaşa degişli hasap edilýän rekordy gaýtalady. Şol bir wagtyň özünde, Puşkaşyň statistikasyny resmi taýdan tassyklaýan maglumatlar ýok. Indiki assist argentinaly oýunçyny futbol taryhynda bu görkeziji boýunça ýeke-täk lidere öwrer.
MLS Kubogynyň ýarym finalynda Hawýer Maskeranonyň topary 1/4 finalda “Filadelfiýa Ýuniony” 1:0 hasabynda utan “Nýu-Ýork Siti” bilen duşuşar.
Bular bilen birlikde indiki tapgyra “Los-Anjelesi” 2:2 hasapdan soň penaltide 4:3 hasabynda utan “Wankuwer Uaýtkeps” çykdy. Soňky dörtden bir final oýny 25-nji noýabrda “San-Diego” bilen “Minnesota Ýunaýtediň” arasynda bolar.
