Argentinanyň Merkezi banky «asyryň goluna» – Maradonanyň geçiren meşhur goluna bagyşlanan ýörite şaýy puluny çykardy.
Bu şaýy 2026-njy ýylda geçiriljek dünýä çempionatyna gabatlanyp taýýarlanyldy. Şol çempionata Argentina ýaryşyň häzirki çempiony hökmünde gatnaşar. Şaýy 1986-njy ýylda bolup geçen dünýä çempionatynda Diego Maradonanyň Angliýanyň derwezesine geçiren goluna bagyşlanypdyr. FIFA bu goly XX asyryň iň gowy goly diýip yglan edipdi.
Şaýyň öň ýüzünde — oýnuň joşgunyny alamatlandyrýan, «teňňeden geçip barýan» futbol topy şekillendirilen. Arka ýüzünde bolsa futbol meýdanynyň çyzgylary we Maradonanyň derwezä çenli geçen ýoly görkezilen: ol topy meýdanyň merkezinde alyp, birnäçe garşydaşyny aldawly hereketler bilen geçip, Argentinany ýarym finala çykaran ýeňiş goluny geçirdi.
Şol duşuşykda Maradona ýene bir gol geçiripdi, ýöne ony eli bilen salypdy. Şol gol «Hudaýyň eli» diýen at bilen taryha girdi. Ahyrynda Argentina 1986-njy ýylyň dünýä çempionatynyň finalynda GFR-iň ýygyndysyny ýeňip çempion boldy.
Şaýy 925 derejeli kümüşden ýasalan. Onuň nominallary 10 dollar, agramy 27 gram, diametri 40 millimetrdir. Içki dolanyşyk üçin 2500 sany çäkli möçberde çykaryldy. Şeýle-de, «halkara dolanyşygy üçin şol bir dizaýnyň altyn teňňeleriniň hem çykarylmagy meýilleşdirilýär» diýip habar berilýär.
