“Çelsi” bir ýylda düzümiň gymmatlamagy, “MÝ” arzanlamagy boýunça reýtingde birinji orny eýeledi

FIFA-nyň hyzmatdaşy bolan Şweýsariýanyň CIES gözleg kompaniýasy ýyllyk reýtingini hödürläp, bir ýylda dünýäniň öňdebaryjy futbol klublarynyň düzümleriniň baha taýdan nähili üýtgändigini görkezdi.

Reýtingde öňdebaryjylar Angliýanyň premýer-ligasynyň klublary boldy: “Çelsi” iň ýokary ösüşi görkezdi. Ýöne iň uly pese gaçyş hem iňlis toparynda – “Mançester Ýunaýtedde” hasaba alyndy.
Seljerme döwri 2024-nji ýylyň 1-nji oktýabryndan 2025-nji ýylyň 1-nji oktýabry aralygyny öz içine alýar. Bu döwürde “Çelsiniň” düzüminiň bahasy 364 mln ýewro ýokarlanyp, hatda “Pari Sen-Žermenden” (+303 mln ýewro) öňe geçdi. Soňra sanaw şeýle görnüşde dowam edýär:

• ·“Aýntraht” (+294 mln ýewro)
• ·“Barselona” (+242 mln ýewro)
• ·“Nottingem Forest” (+211 mln ýewro)
• ·“Brentford” (+191 mln ýewro)
• ·“Bornmut” (+180 mln ýewro)
• ·“Nýukasl Ýunaýted” (+165 mln ýewro)
• ·“Bawariýa” (+152 mln ýewro)
• ·“Wilýarreal” (+141 mln ýewro).

CIES-e görä, “Çelsiniň” ösüşine, esasan, soňky möwsümleriň transferleri we toparyň sport üstünlikleri ýardam etdi. 2022-nji ýyldan bäri Todd Boeliniň konsorsiumy oýunçylara tas 1,5 mlrd funt maýa goýdy, 2025-nji ýylyň tomsunda bolsa klub Žoao Pedro, Estewao we Alehandro Garnaço ýaly futbolçylary öz düzümine goşdy. Netijede, düzümiň umumy bahasy 1,56 mlrd funt boldy, bu hem “Çelsini” dünýäniň iň gymmat – ilkinji gezek 1,5 mlrd funtdan geçen klubuna öwürdi.

Bu görkeziji boýunça toparlaryň antireýtingi şeýle görnüşde:

• ·“Mançester Ýunaýted” (–377 mln ýewro)
• ·“Mançester Siti” (–315 mln ýewro)
• ·“Real Madrid” (–216 mln ýewro)
• ·“West Hem” (–184 mln ýewro)
• ·“Milan” (–147 mln ýewro)
• ·Lewerkuzeniň “Baýeri” (–146 mln ýewro)
• ·“Renn” (–121 mln ýewro)
• ·Dortmundyň “Borussiýasy” (–120 mln ýewro)
• ·“Wulwerhempton” (–110 mln ýewro)
• ·“Leýpsig” (–110 mln ýewro)

CIES Angliýanyň premýer-ligasynyň ýedi klubunyň düzümiň bahasy boýunça dünýä reýtinginiň ilkinji 12-ligine girýändigini belleýär, 20 toparyň ählisi bolsa global reýtingiň ilkinji 60 setirinde ýerleşýär.

Düzümiň bahasy boýunça dünýäniň iň gymmat 12 klubunyň sanawyna şular girdi:

1. “Çelsi” – 1,807 mlrd ýewro
2. “Real” – 1,684 mlrd ýewro
3. “Mançester Siti” – 1,485 mlrd ýewro
4. “Arsenal” – 1,474 mlrd ýewro
5. “PSŽ” – 1,440 mlrd ýewro
6. “Liwerpul” – 1,403 mlrd ýewro
7. “Barselona” – 1,352 mlrd ýewro
8. “Tottenhem” – 1,047 mlrd ýewro
9. “Bawariýa” – 934 mln ýewro
10. “Inter” – 866 mln ýewro
11. “Braýton” – 830 mln ýewro
12. “Mançester Ýunaýted” – 820 mln ýewro