Russiýaly hüjümçi Kiril Kaprizow Milli hokkeý ligasynyň (NHL) “Minnesota Waýld” kluby bilen täze şertnama baglaşdy. Bu şertnama umumy baha we ortaça ýyllyk aýlyk nukdaýnazaryndan professional hokkeýiň taryhynda iň uly ylalaşykdyr diýip, TSN habar neşiri habar berýär.
Taraplaryň arasyndaky ylalaşyga görä, Kaprizow sekiz ýylyň dowamynda 136 million dollar - her möwsüm üçin 17 million dollar alar.
28 ýaşly hüjümçi özüniň NHL-däki karýerasynyň bütin dowamynda “Minnesota” üçin oýnady. Bäş möwsümde 319 oýun oýnap, 386 oçko toplady. Kaprizow Demirgazyk Amerika göçmezden ozal, Kontinental hokkeý ligasynda (KHL) Nowokuzneskiniň “Metallurgy”, Ufanyň “Salawat Ýulaýewi” we Moskwanyň “SSKA-sy” üçin alty möwsüm oýnady.
Ozal umumy bahasy boýunça iň uly şertnama Aleksandr Oweçkiniň “Waşington Kepitals” bilen 2008-nji ýylda gol çekişen şertnamasy hasaplanýardy. Şol döwürde rus hüjümçisi 13 ýylyň dowamynda 124 million dollar ýa-da möwsümde 10 million dollara golaý gazanypdy.
Ortaça ýyllyk aýlygy boýunça Kaprizow “Edmonton Oýlers” toparynyň nemes hüjümçisi Leon Draýzaýtldan (ýylda 14 million dollar) öňe geçdi.
NHL-de “aňryçäk aýlyk” düzgüni hereket edýär: bu klubyň ähli oýunçylarynyň ýyllyk aýlygy belli bir mukdardan ýokary bolup bilmez. Liganyň girdejisi artdygyça, bu aňryçäk köpelýär, şonuň bilen birlikde ýyldyz oýunçylaryň şertnamalary hem artýar. Deňeşdirmek üçin, aňryçäk 2008-nji ýylda 56,7 million dollar, häzir bolsa 95,5 million dollar boldy.
