Žoze Mourinýu tälimçi karýerasynyň başlan ýerine gaýdyp geldi. 18-nji sentýabrda Lissabonyň “Benfikasy” 62 ýaşly portugaliýaly hünärmeniň toparyň baş tälimçisi wezipesine bellenendigini habar berdi.
Şertnama 2027-nji ýylyň tomsuna çenli hereket edýär, ýöne indiki tomus taraplar hyzmatdaşlygy möhletinden ir bes edip biler.
Mourinýu täze wezipede Çempionlar ligasyna şowsuz başlandan soň – topar Azerbaýjanyň “Karabahyndan” utulandan soň işden çykarylan watandaşy Brunu Laženi çalşar.
Belläp geçsek, 2000-nji ýylda hut “Benfikada” ol özbaşdak tälimçi karýerasyna gadam basypdy. Şol wagt Žoze bary-ýogy üç aý işledi, ýöne iki ýyldan öz mümkinçiliklerini görkezip, “Portuny” Çempionlar ligasynda ýeňşe getirdi.
Mourinýunyň soňky kluby Türkiýäniň “Fenerbahçesi” bolupdy, ony awgustyň ahyrynda Çempionlar ligasynyň saýlama oýnundaky utulyşdan soň terk etdi. Gyzykly ýeri, hut “Benfika” Stambul toparyna Ýewropanyň esasy ýaryşyna gatnaşmaga ýol bermändi. “Fenerbahçeniň” prezidenti Ali Koç eýýäm portugaliýaly hünärmeni Lissabon kluby bilen öňünden dilleşmeginde, şol sebäpli kowlandan soň derrew iş tapmagynda aýyplady. Hünärmen bu aýyplamalara özüniň “klubdan gidenden soň hemişe sahypany agdarýandygyny” we hiç wagt hiç kimi aldamandygyny aýdyp jogap berdi.
Karýerasynyň dowamynda Mourinýu “Leýriýa”, “Portu”, Londondan “Çelsi” we “Tottenhem”, Milanyň “Interi”, Madridiň “Realy”, “Mançester Ýunaýted” we Rimden “Roma” ýaly klublara-da ýolbaşçylyk etdi. Ol iki gezek Çempionlar ligasynyň ýeňijisi, üç gezek Angliýanyň çempiony, Italiýanyň we Portugaliýanyň çempiony (iki gezekden), Ispaniýanyň çempiony, Ýewropa ligasynyň we Konferensiýa ligasynyň ýeňijisi, UEFA-nyň Kubogynyň eýesidir.
