Adidas kompaniýasy Climacool Laced 3D çap krossowkalarynyň täzelenen modelini hödürledi. Ol has giň köpçülik üçin niýetlenýär diýip, The Verge ýazýar.
Aýakgap 3D çap usuly bilen taýýarlanan gözenekli gurluşyny saklady, ýöne başga materiallardan klassyky aýakgap diline we bagjygyna eýe boldy. Bu krossowkanyň aýakda oturyşyny sazlamaga mümkinçilik berip, modeli ölçeg taýdan has köptaraplaýyn edýär.
Adidas doly derejede 3D printerde çap edilen Climacool krossowkalaryny, aslynda, 2025-nji ýylyň ýazynda global satuwa çykardy. Kompaniýa bu tehnologiýany on ýyldan gowrak wagt öwrenip, ony ilkibaşda aýry-aýry komponentler üçin ulandy. Häzir bolsa 24 sagadyň dowamynda tutuş bir aýakgaby tikinsiz çap etmek üçin ulanýar. Şeýle gurluş krossowkanyň ýeňil bolmagyny, çalt guramagyny we howa çalşygyny üpjün edýär.
Modeliň gündelik geýmek üçin sazlanandygyna garamazdan, onuň bahasy henizem ýokary bolmagynda galýar. Görkezilen baha – 160 dollar. Kompaniýanyň habar bermegine görä, täze görnüş wagtlaýyn ABŞ-nyň diňe käbir dükanlarynda hödürlener, ýöne ony diňe onlaýn satyn almak bolar.
Kompaniýa wagtyň geçmegi bilen satuw şertleriniň we bahanyň üýtgäp biljekdigini belledi.
