Pagani Automobili kompaniýasy Utopia giperkarynyň ýörite sargyt boýunça döredilen özboluşly aýratynlyklary bolan wersiýasyny çykardy. The Coyote atly nusga üýtgeşik bezegi bilen tapawutlanýar – onuň kuzowynda “Le-Manyň 24 sagady” ýaly çydamlylyk ýaryşlaryna gatnaşan, haraplanan ýaly edip görkezýän ýörite çyzyklar we sypjyryklar bar.
Ulag gyzyl, gök we mawy öwüşginler bilen Bianco Benny reňkine boýaldy. Tutuş awtomobilden Martini Racing reňklerinde zolak geçýär. Interýerde gyzyl-gök deri, açyk karbon we başga reňkli tikin ulanyldy.
Reňklenmedik karbonlardan şikes yzlary ganatlarda, splitterde, bosagada we yzky bamperde ýerleşdirildi.
Model 6,0 litrlik goşa turbinaly V12 Mercedes-AMG bilen enjamlaşdyryldy. Ol 864 at güýjüni berýär. Hereketlendiriji 7 basgançakly mehaniki guty bilen bilelikde işleýär. 100 km/sag çenli tizligi artdyrma 3 sekunt wagt alýar, iň ýokary tizlik 350 km/sag barabar.
Kompaniýa The Coyote-ni sargyt eden adamyň eýýäm bu markadan başga iki superkarynyň bardygyny we her awtomobile “özüniň bir bölegini” siňdirmek isleýändigini belledi.
Bu wersiýanyň bahasy aýdylmaýar. Esasy Pagani Utopia 2,2 mln dollar bolup, 99 nusganyň ählisi modeliň premýerasyndan öň satyldy.
