ABŞ-da geçirilýän futbol boýunça Klublaýyn dünýä çempionatynyň 1/8 final oýnunda Milanyň “Interi” garaşylmadyk ýagdaýda “Fluminenseden” 0:2 hasabynda utuldy.
Toparlar Şarlottdaky “Bank of Amerika” stadionynda oýnady. Braziliýa kluby oýnuň başynda we ahyrynda gol geçirdi – Herman Kano (3-nji minut) we Erkules (90+3) tapawutlandy.
Orlandodaky (ABŞ) “Kemping Uorld” stadionynda geçirilen beýleki bir oýunda Angliýanyň “Mançester Sitisi” bilen “Al-Hilýal” saud kluby duşuşdy. Oýun saud klubunyň goşmaça wagtda 4:3 hasabynda utmagy bilen tamamlandy.
Oýnuň esasy wagtynda toparlar iki gol bilen alyşdy – 2:2. “Sitiniň” düzüminde Bernardu Silwa (9) we Erling Holand (55) gol geçirdi. Saud toparyndan Markos Leonardo (46) we Malkom (52) öz hasabyna gol ýazdy.
Ekstra-taýmda iňlis toparyndan Fil Foden (104), “Al-Hilýaldan” bolsa Kalidu Kulibali (94) we ýene Markos Leonardo gol girizdi (112-nji minutda ýeňiş goly).
4-nji iýulda Orlandoda geçiriljek dörtden bir finalda “Al-Hilýal” “Fluminense” bilen duşuşar.
Mundan öň Klublaýyn dünýä çempionatynyň 1/4 finalynyň iki garşydaş toparlary belli boldy: “Palmeýras” “Çelsi”, “Bawariýa” “PSŽ” bilen oýnar.
