Magnus Karlsen 19 ýaşly hindi grossmeýsteri Gukeş Dommarajudan ýeňleninden soň duýgularyna erk edip bilmedi. Oýundan soň ol ýumruk bilen stola urdy, metbugat wekilleri bilen gürleşmän, çaltlyk bilen ýaryşyň geçirilýän ýerini terk etdi.
Oýun Norway Chess ýaryşynyň altynjy tapgyrynda boldy. Birinji tapgyrda Karlsen Gukeşi ýeňdi we ikinji partiýanyň aglaba böleginde hem ýeňişli ýagdaýda oýnaýardy. Emma seýtnotda (göçümleri pikirlenip ýetişmezlik üçin wagt ýetmezçiligi) seýrek ýalňyşlyk goýberdi, Gukeş bolsa bu ýalňyşlykdan peýdalanyp bildi.
Bu ýeňiş Gukeşiň Karlsene garşy resmi duşuşyklarda ilkinji üstünligidir.
“Häzir meniň üçin iň möhüm zat – bu partiýada utulmandygym. Ýöne, elbetde, Magnusy islendik ýagdaýda hem ýeňmek – bu aýratyn duýgy” diýip, Dommaraju aýtdy.
The Guardian neşiriniň bellemegine görä, Karlseniň beýle reaksiýasy oňa mahsus däl, sebäbi adatça ol özüni saklap bilýär.
Bu ýeňiş Gukeşe ýaryşyň tablisasynda üçünji orna çykmaga mümkinçilik berdi. Onuň 11,5 utugy bar, Karlseniň – 12, Fabiano Karuananyň – 12,5. Ýaryşda entek dört tapgyr bar.
Hindistanyň Premýer-ministri Narendra Modi Dommarajuny gutlap, bu ýeňşi “aýratyn üstünlik” hökmünde suratlandyryp, onuň “zehiniň we ygrarlylygyň” nyşany bolup durýandygyny aýtdy.
Ýatladyp geçsek, 2024-nji ýylyň dekabrynda Gukeş Dommaraju 18 ýaşynda dünýäniň iň ýaş küşt çempiony boldy.
