Serbiýaly tennisçi Nowak Jokowiç Ženewada geçirilen ATP ýaryşynyň ýeňijisi boldy.
Ýaryşda ikinji belgi bilen ýerleşdirilen 38 ýaşly türgen finalda dünýäniň 31-nji raketkasy, polşaly Hubert Hurkaçy 5:7, 7:6 (7:2), 7:6 (7:2) hasabynda utdy.
Şeýlelikde, Jokowiç karýerasynda ýekelikde 100-nji ATP titulyny gazandy. ATP Tour-da (1990-njy ýyldan bäri) bu görkeziji boýunça rekord şweýsariýaly Rojer Federere, Açyk döwürde (1968-nji ýyldan bäri) amerikaly Jimmi Konnorsa (109) degişlidir.
Häzirki wagtda Jokowiç dünýä reýtinginde altynjy orny eýeleýär. Ol karýerasynda 143-nji we şu ýylyň dowamynda ikinji finalynda oýnady. Mart aýynda serbiýaly türgen Maýamide geçirilen “Masters” ýaryşynyň finalynda çehiýaly Ýakub Menşikden utuldy.
Ženewadaky ýaryşyň ýeňijisi 90,675 müň ýewro pul baýragyny we 250 reýting utugyny, finalçy 52,89 müň ýewro we 165 utuk alar.
