Belgiýanyň ýarymgoragçysy Kewin De Brýoýne sosial ulgamlarda möwsümiň ahyrynda “Mançester Sitiden” gitjekdigini habar berdi. Futbolçy topardan erkin agent hökmünde çykar.
"Futbol meni siziň hemmäňiziň ýanyňyza - bu şähere getirdi. Men ömrümiň bu döwrüniň durmuşymy üýtgetjekdigini aňmazdan, arzuwymyň yzyndan dynman ylgadym. Bu şäher. Bu klub. Bu adamlar... maňa HEMME ZAT berdi. Mende tutuşlygyma özümi size bagyş etmekden başga alaç galmady. Bilýäňizmi – biz HEMME ZATDA ýeňdik!
Islesek-islemesegem, hoşlaşmaly wagt geldi. Mançester çagalarymyň pasportynda, has möhümi hem, maşgalamyň her bir agzasynyň kalbynda ebedilik galar. Bu hemişe biziň öýümiz bolar. Şähere, kluba, işgärlerimize, topardaşlarymyza, dostlarymyza we maşgalamyza bu 10 ýyllyk başdan geçirmeler üçin sagbolsun aýdýarys. Ýöne her bir hekaýatyň ahyry bar. Bu iň gowy bap boldy. Geliň, bilelikdäki soňky pursatlarymyzdan lezzet alalyň!” – diýip, Brýoýne ýazdy.
Bu täzelige "Mançester Siti" toparynyň ýolbaşçysy Hosep Gwardiola jogap berdi.
"Bu ýurtda beýik ýarymgoragçylar köp bolupdy, ýöne Kewin iň gowularyň biri. Ol diňe bir pursatlary döretmän, muny ýyl-ýyldan iň ýokary derejede ýerine ýetirýär. Onuň futbol intellekti, soňky pursatdaky çykalgalary – dilde beýan edip bolmajak zehin” – diýip, Gwardiola belledi.
De Brýoýne “Mançester Sitide” 2015-nji ýyldan bäri oýnaýar. Toparyň düzüminde ol 413 oýna gatnaşyp, 106 gol geçirdi we 174 gezek netijeli pas berdi. “Siti” bilen 16 baýrak gazandy.
Häzirki möwsümde ýarymgoragçy 31 oýna gatnaşyp, 4 gol geçirdi we 7 gezek netijeli pas berdi. Klub bilen baglaşylan şertnama 2025-nji ýylyň tomsuna çenli dowam edýär. Transfermarkt onuň bazar bahasyny 27 million ýewro diýip çaklaýar.
