Lamborghini özüniň ýol ulaglarynyň arasyndaky täze tizlik rekordyny goýdy. Täze gibrid model – «Revuelto» bary-ýogy 2,2 sekuntda 100 km/sag tizlige ýetmegi başardy. Şeýle hem çärýek mil aralygy (402 metr) 9,41 sekuntda geçdi. Synaglar ABŞ-nyň Florida ştatyndaky «Bradenton Motorsports Park» ýaryş meýdançasynda geçirildi. Onuň netijeleri «Revuelto» modeliniň tizleniş taýdan giperkarlar bilen bäsleşip bilýändigini görkezdi diýip, «autoevolution» neşiri habar berýär.
«Revuelto» modeliniň güýç ulgamy 6,5 litrlik atmosferiki V12 benzinli hereketlendirijini we üç sany elektromotory öz içine alýar. Ulagyň umumy kuwwaty 1001 at güýjüne ýetýär. Tizlik 8 basgançakly robotlaşdyrylan transmissiýa arkaly geçirilýär. Doly herekete getiriji we ýörite «Launch Control» ulgamlary bolsa, ulagyň durnukly ýagdaýda iň ýokary tizlenme bilen herekete gelmegini üpjün edýär.
Bu model hatda iň ýönekeý görnüşinde-de çärýek mili 9,5 sekuntdan az wagtda geçýär. Titandan ýasalan gaz çykaryjy (wyhlop ulgamy) bilen enjamlaşdyrylan ýörite modifikasiýaly görnüşi bolsa, bu netijäni 9,41 sekunda çenli gowulandyrdy. Ujypsyz gijikme bilen ulagyň titan ulgamly görnüşi Sant-Agatanyň klassyky «öküzleriniň» kuwwatly sesini berip, güýçli duýgulary döredýär.
«Revuelto» ýol ulaglarynyň arasynda DragTimes reýtinginiň täze lideri boldy. Ol «Ferrari SF90», «Porsche Taycan Turbo S» we «Tesla Model S Plaid» ýaly güýçli garşydaşlaryny yzda galdyrdy. Bahasy 600 müň dollardan başlaýan model täze nesil superkarlaryň statusyny tassyklaýar: ol ýabany güýjüň, tizligiň we geljegiň tehnologiýalarynyň bir kuzowda jemlenen görnüşi bolup durýar.
