Ford täze Mustang GTD sport awtoulagyny alyp-satarlardan (asyl bahasyndan alyp, gymmada satýanlardan) goramak üçin ýörite düzgünleri girizdi. Täze düzgünlere laýyklykda, Mustang GTD-ni satyn aljak adamlar, ony iki ýylyň dowamynda başga birine satmazlyk hakynda ylalaşyga gol çekmeli bolarlar. Kompaniýanyň maksady – bu awtoulagyň «hakyky» höwesjeňlere gowuşmagyny üpjün etmek diýip, «Ford Authority» habar berýär.
Mundan öň Ford orta hereketlendirijili GT kupesi satylanda hem şular ýaly düzgünler girizipdi.
Mustang GTD – ýaryş üçin niýetlenen Mustang GT3-üň adaty ýol üçin niýetlenen görnüşidir. Onuň kuzowy ýeňil uglerod süýüminden ýasalan, şeýle-de asma ulgamyny sazlap bolýar. Awtoulag 5,2 litrlik güýçli V8 hereketlendiriji bilen enjamlaşdyrylan. Bu hereketlendiriji 826 at güýjüni öndürýär.
Bu «Mustang» Nýurburgring ýaryş ýolunda uly üstünlik gazandy. Ol bir aýlawy 6 minut 57,685 sekuntda geçdi. Amerikan awtoulaglaryň arasynda bu iň gowy netije bolup, umumy sanawda bolsa ýedinji orny eýeledi.
Mustang GTD-niň başlangyç bahasy 300 müň dollardan ýokary. Bu awtoulag üçin isleg hem gaty ýokary. Hatda geçen ýylyň ýazynda sargyt sanawy eýýäm 2026-njy ýyla çenli dolupdy. Alyjylaryň arasynda tanymal wideoblogerler bar. Mysal üçin, Amerikanyň meşhur týuning ussahanasy Hennessey Performance-yň esaslandyryjysy Jon Hennessi hem bu awtoulagyň hyrydarlaryndan biri.
Mustang GTD-ni satyn almak isleýänler gönümel Ford-a ýörite ýüz tutmaly bolýar. Kompaniýa her bir alyjyny aýratyn saýlap alýar. Müşderilere sowalnama doldurdylýar. Olara Ford awtoulaglaryny ulanmak boýunça tejribeleri we Mustang GTD-ni geljekde nädip ulanjakdygy bilen baglanyşykly soraglar berilýär. Ford bu maglumatlar esasynda kimiň awtoulagy satyn alyp biljekdigini kesgitleýär.
