Madridiň “Realynyň” we Braziliýanyň milli ýygyndysynyň wingeri Winisius Žunior Globe Soccer Awards tarapyndan ýylyň iň gowy oýunçysy we hüjümçisi diýlip ykrar edildi. Baýragyň gowşurylyş dabarasy 27-nji dekabrda BAE-de geçirildi.
2024-nji ýyl möwsüminde Winisius ähli ýaryşlarda “Realyň” we milli ýygyndynyň düzüminde 34 gol geçirdi we 16 assist bilen tapawutlandy. Ol “Reala” La Ligada, Çempionlar ligasynda, Ispaniýanyň we UEFA-nyň Superkuboklarynda, şeýle-de Yklymara kubokda ýeňiş gazanmaga kömek etdi.
Onuň topardaşy, angliýaly ýarymgoragçy Jud Bellingem ýylyň iň gowy ýarymgoragçysy diýlip ykrar edildi. Bellingem klub we milli ýygyndy üçin 17 gol we 17 assist bilen tapawutlandy.
“Realyň” özi ýylyň iň gowy kluby adyny aldy. Karlo Ançelottiniň ýolbaşçylygynda topar möwsümde bäş titul, şol sanda Çempionlar ligasynda we La Ligada ýeňiş gazandy.
Ançelotti hem dabarada baýraksyz galmady – italiýaly hünärmen ýylyň iň gowy tälimçisi boldy.
Iň gowy ýaş oýunçy hökmünde Ispaniýanyň milli ýygyndysy bilen Ýewropa çempiony bolan 17 ýaşly Lamin Ýamal saýlandy.
Globe Soccer Awards dabarasy her ýyl dünýä futbolynda gazanylan ajaýyp üstünlikleri ykrar edýär.
