Futbol taryhynda iň köp titula eýe bolan futbolçylaryň biri Lionel Messi Azerbaýjanyň paýtagtyna baryp görer. Argentinaly futbolçy bilen birlikde Bakuwa onuň topardaşlary Luis Suares, Serhio Buskets we Žordi Alba gider.
Futbolçylar öň “Barselonada” bilelikde oýnapdylar, häzir bolsa “Inter Maýami” amerikan klubunda çykyş edýärler.
11-nji dekabrda dünýä futbolynyň ýyldyzlary Bakuwyň kristal zalynda muşdaklary bilen duşuşarlar. Çärä gatnaşyjylar dünýä çempionyny we “Altyn topuň” sekiz gezek eýesini görüp bilerler. Maksatnamanyň çäklerinde Messiniň durmuşy we karýerasy barada film hem görkeziler.
Şeýle-de, myhmanlara aýdym-saz programmasy garaşýar. Belli fransiýaly aýdymçy we di-jeý Willi Uilýam (Willy William) we Rumyniýanyň dens-pop topary Morandi köpçüligiň öňünde çykyş eder.
Bellenilişi ýaly, petek satuwy başlanandan soň, bir günüň içinde 10 000-den gowrak petek satyn alyndy. Satuwdan alnan serişdeler haýyr-sahawata gönükdiriler.
