Bridge7 kinokompaniýasy “Harabalykdan çykan millioner” («Миллионер из трущоб») filminiň dowamyny çykarmaga hukuk aldy diýip, Variety habar berýär. Bu şertnama Britaniýanyň asyl filmiň döredilmegine gatnaşan Celador studiýasy bilen baglaşyldy.
Netflix-iň öňki prodýuseri Swati Şetti we CAA-nyň öňki agenti Grant Kessman tarapyndan döredilen Bridge7 kompaniýasy Celador we Film4 bilen hyzmatdaşlykda sikweliň üstünde işläp başlar. Kompaniýa öz beýanynda: "Her dürli gahrymanly her hili adam kysmatlaryny" döretmekden ugur alýandygyny aýtdy.
“Käbir kysmatlar titrlerden soňam köp wagtlap ýatda galýar we “Harabalykdan çykan millioner” hem şolaryň biridir. Bu sýužet medeni we geografiki çäklerden çykyp gidýär" - diýip, Şetti we Kessman belledi.
Swati bilen Grantyň öz täze kompaniýasyny açmak üçin "Harabalykdan çykan millioneriň" sikwelini saýlandygyna begenýärin" – diýip, öz nobatynda Celador International kompaniýasynyň başlygy Pol Smit sözüniň üstüni ýetirdi.
2008-nji ýylda düşürilen bu film iň gowy film we iň gowy režissýor ýaly baýraklary hem goşmak bilen, sekiz sany “Oskar” baýragyny aldy. Şeýle hem bu film uly kinoteatrda ilkinji gezek çykyş eden aktýor Dew Pateliň halkara derejesinde ykrar edilmegine sebäp boldy.
