8-nji noýabrda Aşgabatda sebitleýin ministrler maslahaty başlandy. Maslahata gatnaşyjylar Merkezi Aziýada raýatsyzlygy ýok etmek boýunça çäreleri ara alyp maslahatlaşýarlar diýip, Orient habar berýär.
Maslahatyň geçirilmegi BMG-niň dünýäde raýatsyzlyga garşy göreşe bagyşlanan onýyllyk #IBelong kampaniýasynyň tamamlanmagy hem-de oktýabr aýynda öz işine başlan raýatsyzlygy ýok etmek boýunça Global bileleşigiň işe girizilmegi bilen gabat gelýär.
Foruma Türkmenistanyň daşary işler ministriniň orunbasary Mähri Bäşimowa, Türkmenistanyň Döwlet migrasiýa gullugynyň başlygy Amanmuhammet Sazakow, BMG-niň Bosgunlaryň işi baradaky Ýokary Komissarynyň Müdirliginiň (UNHCR) ýolbaşçysynyň goramak meseleleri boýunça kömekçisi Ruwendrini Menikdiwela, BMG-niň Türkmenistandaky hemişelik utgaşdyryjysy Dmitriý Şlapaçenko, şeýle-de Gazagystanyň, Gyrgyzystanyň, Täjigistanyň, Özbegistanyň wekilleri we UNHCR-iň hünärmenleri gatnaşdy.
Sebitleýin maslahat Merkezi Aziýa döwletleriniň arasynda raýatsyzlyga garşy göreşmek işinde tejribe alyşmak we hyzmatdaşlygy berkitmek üçin möhüm meýdança bolup hyzmat edýär. Türkmenistan maslahatda bu ugurda gazanan üstünlikleri barada belledi: ýurt 32 000-den gowrak adama, şol sanda bosgunlara we raýatlygy bolmadyk adamlara raýatlyk berdi.
Şeýle üstünlikler syýasy erki, kanunçylyk özgertmelerini, halkara hyzmatdaşlygy, şeýle-de şahsyýeti kesgitlemek we hasaba almak ulgamlarynyň kämilleşdirilmegini öz içine alýan toplumlaýyn çemeleşmäniň netijesinde mümkin boldy.
