Beýik Britaniýanyň Milli sowatlylyk gaznasy (NLT) çagalaryň we ýetginjekleriň arasynda okamaga bolan gyzyklanmanyň düýpgöter peselendigini mälim etdi.
Barlagyň berýän maglumatlaryna görä, oňa gatnaşan 5-18 ýaş aralygyndaky 76 131 çaganyň diňe 34,6%-i boş wagtlary keýpine kitap okaýar. Bu 19 ýylyň içinde iň pes görkezijidir we 2023-nji ýyldakydan 8,8 göterim pesdir.
2023-nji ýylda çagalaryň 28%-i her gün okapdyr, ýöne 2024-nji ýylda bu görkeziji 20,5%-e çenli kemelipdir. Gyzyklanmanyň peselmegi 2016-njy ýylda başlandy, şonda çagalaryň diňe üçden iki bölegi okamaklyga oňyn garaýardy.
Hasabatda gender tapawudy hem ýüze çykaryldy, ýagny oglanlaryň okamaga gyzyklanmasy 28,2% we gyzlaryňky - 40,5% boldy, ýöne iki jynsyň arasynda hem pese düşüşlik görünýär.
Aýda azyndan bir gezek boş wagtlarynda okaýan çagalar okamagyň dynç almaga (56,6%) we özlerini bagtly duýmaga (41%), umuman täze zatlary öwrenmäge (50,9%) we beýleki adamlaryň garaýyşlaryna (32,8%) düşünmäge we başga medeniýetler barada täze zatlary (32,4%) bilmäge kömek edýändigini aýtdy.
Pikir soraşmanyň netijeleri barada teswir ýazan çagalar ýazyjysy Frenk Kottrell-Boýs okamagyň gymmatly we ösdürilmeli “görünmeýän artykmaçlykdygyny” aýtdy. Gaznanyň hünärmenleri hökümedi çagalaryň arasynda okamaga bolan gyzyklanmany höweslendirmek we ony bilim syýasatynda ileri tutulýan ugra öwürmek maksady bilen, iş toparyny döretmäge çagyrdy.
