“Inter Maýami” futbol kluby myhmançylykda “Kolambus Krýudan” üstün çykyp, MLS-iň yzygiderli möwsüminiň çempiony titulyny möhletinden ir gazandy. Duşuşyk Kolambusdaky “Mapfre Stedium” stadionynda geçirilip, 3:2 hasabynda tamamlandy.
Ýeňijileriň düzüminde “Inter Maýaminiň” argentinaly hüjümçisi Lionel Messi iki gol geçirdi, ýene bir goly toparyň başga bir ýyldyzy – urugwaýly Luis Suares girizdi.
“Kolambus Krýudan” Diego Rossi we Kuço Ernandes (penaltiden) gol bilen tapawutlandy. 63-nji minutdan ýer eýeleri Rudi Kamaşo meýdançadan çykarylandan soň azlykda oýnadylar.
Bu ýeňşiň netijesinde “Inter Maýami” 68 utuk toplady we bu hem oňa çempionatyň gutarmagyna iki tapgyr galanda möhletinden ir Supporters’ Shield baýragyny almaga mümkinçilik berdi. Topar Gündogar konferensiýasynda birinji orunda barýar, ol ýakyn bäsdeşinden 11 utuk öňde.
Topar üçin indiki tapgyr MLS Kubogynyň pleý-offuna gatnaşmak bolar, bu ýerde 18 topar – Günbatar we Gündogar konferensiýalarynyň her birinden dokuz topar bäsleşýär.
Çempionatdaky ýeňiş “Inter Maýamä” KONKAKAF Çempionlar ligasyna-da ýollamany üpjün etdi.
Indiki tapgyrda “Inter Maýami” “Toronto” bilen duşuşar.
