"Türkmenistan" kinokonsert merkezi 1-nji sentýabrda Aşgabadyň ýaşaýjylary hem-de myhmanlary üçin täsirli şüweleňleri taýýarlady.
12:00-da BTS k-pop toparynyň konsertiniň wideogörkezilişi bolar. Ol Black Fire tans toparynyň çykyşy bilen utgaşdyrylar. Koreý boý-bendiniň muşdaklary üçin söýgüli aýdymlarynyň dünýäsine aralaşmagy üçin bu ajaýyp mümkinçilik bolar.
17:00-da "Biz we çagalar" atly illýuziýa şüweleňi bolar. Täze okuw ýylynyň başlanmagy mynasybetli tomaşaçylara täsirli fokus çykyşlary we jadyly emeller görkeziler.
Teatr sungatynyň muşdaklary üçin bolsa, Aşgabatdaky A.S.Puşkin adyndaky rus drama teatry ähli ýaşdakylar üçin sahnalary taýýarlady.
1-nji sentýabrda sahnada S.Astrahansewiň pýesasy esasynda "Gyzyl şyrdajyk" oýny görkeziler (11:00 we 13:00). 19:00-da bolsa O.Wolkowyň we M.Mämmetkurbanowyň pýesasy esasynda "Türkmenleriň bagty" atly oýun görkeziler.
1-nji sentýabrda şeýle hem Aşgabatdaky Türkmenistanyň Döwlet sirki hem täze möwsümini açar. Sirk maksatnamasyna dürli görnüşli çykyşlar, haýwanlaryň täsin oýunlary girer.
Bu möwsümde tomaşaçylar meşhur "Galkynyş" at üstündäki oýunlar toparynyň, "Türkmen jigitleri" toparynyň, şeýle hem "Gündogar ýyldyzlar" toparynyň ýaş zehinleriniň çykyşlaryna tomaşa edip bilerler.
Çykyşlar 18:00-da başlanar. Biletleri sirkiň kassasyndan alyp bolar.
Goşmaça maglumaty sirk.gov.tm saýtyndan ýa-da telefonlar arkaly alyp bolar:
36-10-95;
36-10-34.
