3-nji awgustda “Galatasaraý” bilen “Beşiktaş” klublarynyň arasynda Türkiýäniň Super Kubogy ugrundaky oýun geçirildi. Toparlar Stambuldaky “Atatürk Olimpýat” stadionynda duşuşdylar. Oýna badalga beriji jürlewük Aşgabat wagty bilen 22:45-de ýaňlandy. Gara-aklar 5:0 hasabynda uly ýeňiş gazandylar.
“Beşiktaş” oýnuň eýýäm birinji minutynda öňe saýlandy. Norwegiýaly goragçy Ýonas Swenssonyň topy geçirmeginde italiýaly hüjümçi Çiro Immobile gol saldy. 61-nji minutda bolsa Swenssonyň özi “Galatasaraýyň” derwezesine gol girizdi. 80-nji minutda Immobile 11 metrlik urgudan ikinji goluny geçirdi. 90+1-nji minutda Rafael Silwa toparyň hasabyna dördünji goly ýazdy. Ýene bir minutdan soň Mustafa Hekimoglu hasaby 5:0 etdi.
Belläp geçsek, 2023/2024 möwsüminiň jemi boýunça “Galatasaraý” 38 oýunda 102 utuk gazanyp, Türkiýäniň çempiony boldy. “Beşiktaş” geçen möwsümde Türkiýäniň Kubogynyň eýesi boldy, ol final oýnunda “Trabzonspory” 3:2 hasabynda utdy.
