2024-nji ýylyň futbol boýunça Ýewropa çempionatynda ýeňiji bolan Ispaniýanyň milli ýygyndysy 28,25 mln ýewro möçberde baýrak aldy. Sport.es ispan neşiriniň maglumatlaryna görä, bu mukdaryň 40%-i futbolçylara berler.
Britaniýanyň Metro neşiri Ýewro-2024-üň umumy baýrak gaznasynyň 331 mln ýewro bolandygyny habar berýär. Bu mukdar 24 toparyň arasynda paýlanýar. Her topar netijelerine garamazdan 9,25 mln ýewro möçberde bir gezeklik töleg aldy.
Toparlaýyn tapgyrda toparlar ýeňiş üçin 1,0 mln ýewro we deňme-deňlik üçin 500 000 ýewro aldylar. 1/8 finala çykyş 1,5 mln ýewro, dörtden bir finala çykyş 2,5 mln ýewro, ýarym finala çykyş bolsa 4 mln ýewro getirdi.
Ikinji orny eýelän Angliýa 5 mln ýewro möçberde goşmaça töleg aldy, Ispaniýa ýaryşda ýeňiş gazanandygy üçin 8 mln ýewro möçberde baýraga mynasyp boldy.
Ispan topary toparlaýyn tapgyryň we pleý-off tapgyrynyň ähli oýunlarynda ýeňiş gazanandygy üçin iň ýokary mukdary gazandy.
