15-nji iýulda Amerikanyň Kubogy – 2024-üň Argentinanyň we Kolumbiýanyň milli ýygyndylarynyň arasynda final oýny geçirildi. Maýamidäki (ABŞ, Florida ştaty) “Hard Rok” stadionynda geçirilen duşuşyk goşmaça wagtda hüjümçi Lautaro Martinesiň goly netijesinde argentinalylaryň 1:0 hasabynda ýeňşi bilen tamamlandy.
Indiwidual baýraklar:
- Iň gowy bombardir: Lautaro Martines (Argentina) – 5 gol
- Iň gowy oýunçy: Hames Rodriges (Kolumbiýa). Ýaryşyň alty oýnunda futbolçy öz hasabyna bir gol we alty asist ýazdy.
- Iň gowy derwezeban: Emiliano Martines (Argentina). Derwezeban ýaryşda 6 oýnuň 5-isinde gol geçirtmedi, şeýle-de 1/4 finalda Ekwador bilen oýundan soňky tapgyrda iki 11 metrlik urgyny gaýtardy (1:1, 4:2 pen.).
- Finalyň iň gowy oýunçysy: Anhel Di Mariýa (Argentina). Onuň üçin bu oýun milli ýygyndynyň düzüminde iň soňky oýun boldy.
Kopa Amerika – 2024-üň finaly stadiondaky bidüzgünçilikler bilen bulaşdy. Janköýerleriň dyknyşygy we peteksiz girmek synanyşygy sebäpli oýnuň başlanmagy 1 sagat 20 minut yza süýşürildi. Marca-nyň maglumatlaryna görä, oýun üçin 25 müňe golaý galp petek satyldy. Bidüzgünçilikleriň netijesinde 12 adam tutuldy, azyndan 7 adam lukmançylyk kömegini aldy.
Final oýnunyň arakesmesinde kolumbiýaly aýdymçy Şakira çykyş etdi. Iki ýarymyň arasyndaky arakesme tas 25 minut dowam etdi.
Belläp geçsek, Argentina yzygider üç uly halkara ýaryşynda ýeňiş gazandy. Mundan öň, Lionel Skaloniniň topary 2022-nji ýylyň dünýä çempionatynda we 2021-nji ýylyň Amerikanyň Kubogynda ýeňiji boldy. Argentina üç sany uly ýaryşy yzygider utan Ispaniýanyň milli ýygyndysynyň üstünligini gaýtalady – Ýewro-2012, DÇ-2010 we Ýewro-2008.
