Solt-Leýk-Sitide (Ýuta ştaty, ABŞ) geçiriljek PFL ýaryşynyň esasy söweşleri 22-nji iýunda irden (Aşgabat wagty bilen 05:00-da) başlar. Bu ýaryşyň çäklerinde Türkmenistanda garyşyk başa-baş söweş sungatynyň muşdaklary üçin köp garaşylýan söweş Döwletjan Ýagşymyradow bilen kamerunly Simon Biýongyň arasyndaky tutluşykdyr.
Ýagşymyradow yzygider dört ýeňişden ybarat tapgyrda barýar. Ol aprel aýynda Las-Wegasdaky (Newada ştaty) PFL 2 ýaryşynda bolan soňky söweşinde sloweniýaly Jeýkob Nedony birinji raundda tehniki nokaut bilen ýeňdi. Onuň professional rekordy: 22 ýeňiş, 7 ýeňliş we bir deňme-deňlik.
Türkmen söweşijisiniň indiki garşydaşy Simon Biýong 2017-nji ýyldan bäri garyşyk başa-baş söweşlerde professional derejede çykyş edýär. Ol 2021-nji ýylda Bellator-da ilkinji gezek çykyş etdi. Onuň hasabynda 9 ýeňiş (7-si nokaut bilen) we 4 ýeňliş bar. Aprel aýynda bolan soňky söweşinde Antonio Karlos Žuniordan birinji raundda demikdiriji usul bilen ýeňildi.
Ýarym agyr agramda (93 kg çenli) Ýagşymyradow bilen Biýongyň arasyndaky söweşiň 05:30 töweregi başlamagyna garaşylýar. Türkmenistanda söweş Älem TV-de elýeterli bolan Setanta Sports kanalynda ýaýlyma berler.
