Microsoft kompaniýanyň kiberhowpsuzlygyny güýçlendirmäge işjeň gatnaşýan işgärlerini höweslendirmek üçin täze maksatnama taýýarlady. Oňa laýyklykda, işgäriň her biriniň goşandyna görä baha berler we iň işjeňler sylag alarlar diýip, CNBC-e salgylanýan NUR.KZ habar berýär.
Microsoft-yň wise-prezidenti Bred Smitiň ABŞ-nyň Wekiller palatasynda programma üpjünçiligini öndürmekde howpsuzlygy üpjün etmegiň ýollary baradaky diňlenişiginde şeýle beýanaty edenligi bellendi. Smit üýtgeşmeleriň Microsoft-yň müşderi maglumatlaryny goramak strategiýasynyň bir bölegidigini aýtdy.
Bu başlangyç ABŞ-nyň hökümet işgärleriniň elektron poçtasynyň, çak bilen, hytaýly hakerler tarapyndan döwülmegi bilen bagly waka jogap boldy. Bu işiň jikme-jiklikleri Microsoft tarapyndan 2023-nji ýylda aýan edildi, şondan soň kompaniýa kiberhowpsuzlyk amallaryny gözden geçirmäge borçlandy.
Smit 2024-nji ýylyň 1-nji iýulyndan başlaýan 2025-nji maliýe ýylynda kiberhowpsuzlyk Microsoft üçin esasy ileri tutulýan ugur boljakdygyny aýtdy.
