“Inter Maýaminiň” we Argentinanyň milli ýygyndysynyň hüjümçisi Lionel Messi 2024-nji ýylda Parižde geçiriljek Olimpiýa oýunlaryna gatnaşmajakdygyny aýtdy.
ESPN AR bilen söhbetdeşlikde Messi öz gelen netijesini düşündirdi: “Men Maskerano (Argentinanyň U23 milli ýygyndysynyň tälimçisi) bilen gürleşdim we ikimizem ýagdaýa düşündik. Bu kyn, sebäbi Amerikanyň Kubogy başlaýar we men “Inter Maýamiden” yzygider iki ýa-da üç aý çetleşmeli bolaryn. Iň esasy zat, meniň ýaşymda oýun üçin pursaty dogry saýlamak gerek, yzygider iki ýaryş – bu kyn”.
Şeýle-de, argentinaly oýunçy “Inter Maýaminiň” karýerasynda iň soňky klub boljakdygyny tassyklady.
“Häzirki günde men muny doly ynam bilen aýdyp bilerin. Men futbol oýnamagy gowy görýärin we her oýun bilen bu duýgy hasam güýçlenýär. Sebäbi men wagtyň köp galmandygyna düşünýärin” – diýip, Messi aýtdy.
Messi karýerasyny tamamlandan soň tälimçilik işi bilen meşgullanjakdygy ýa-da ýokdugy baradaky soraga bolsa otrisatel jogap berdi.
“Men tälimçi bolmak islemeýändigimi hemişe aýdýardym. Men muny halamok” – diýip, Leo aýtdy.
Ýatlap geçsek, Messi “Inter Maýami” toparyna 2023-nji ýylyň iýul aýynda geçdi we 2025-nji ýylyň dekabr aýyna çenli möhlet bilen şertnama baglaşdy. Häzirki möwsümde Messi 15 oýna gatnaşyp, 14 gol geçirdi we 11 netijeli geçirim etdi.
Tomusky Olimpiýa oýunlary 2024-nji ýylyň 26-njy iýulyndan 11-nji awgust aralygynda Parižde geçiriler.
