Kia kompaniýasy 2020-nji we 2024-nji ýyllar aralygynda ABŞ-da öndürilen 462 869 sany Telluride krossoweriniň yzyna çagyrylandygyny habar berdi. Yza çagyrylmagynyň sebäbi elektrik sazlaýjyly öňdäki oturgyçlarda ýangyn döremeginiň mümkindigi bilen bagly.
Milli ýol hereketiniň howpsuzlygyny dolandyryş gullugynyň (NHTSA) maglumatlaryna görä, kemçilik oturgyjyň mehanizminiň bölekleriniň nädogry süýşmegine sebäp bolup, elektrik hereketlendirijisine hemişelik naprýaženiýany berip biler. Bu bolsa öz gezeginde onuň güýçli gyzyp, netijede ýangynyň döremegine sebäp bolýar.
Kia ýangynyň ulag sürlüp barýarka-da, awtoulag duralgasynda duran wagty hem bolup biljekdigini nygtaýar. Kompaniýa Telluride-niň eýelerine abatlaýyş işleri geçirilýänçä ulaglaryny ýapyk jaýlarda goýmazlygy maslahat berdi.
Häzirki wagtda 2023-nji ýylyň Kia Telluride-sinde sürüjiniň oturgyjynda ýangynyň döremegi bilen bagly diňe bir ýagdaý bar. Mundan başga-da, aşa gyzmak sebäpli oturgyçlaryň aşagynda bölekleriň eremeginiň alty sany ýagdaýy tassyklanyldy.
Mundan öň, Toyota kompaniýasy hereketlendirijilerde bar bolan mehaniki galyndylar sebäpli ABŞ-da benzinli V6 bilen Tundra kysymly awtoulaglary we Lexus LX kysymly awtoulaglary yzyna çagyrýandygyny habar beripdik. Eýelerine eýýäm öwezini dolmak wada berildi, ýöne öndüriji meseläni nädip çözmelidigini entek kesgitlemedi.
