Fransiýanyň milli ýygyndysynyň düzüminde çempion Kilian Mbappe Madridiň “Realy” bilen bäşýyllyk şertnama baglaşdy. Bu barada klubuň resmi saýtynda habar berilýär.
25 ýaşly hüjümçi täze topara “PSŽ-ni” terk edeninden soň erkin agent hökmünde goşular.
Mbappe topara geçmegi bilen bagly begenjini eýýäm paýlaşdy: “Men arzuwymdaky klubuma goşulýandygyma begenýärin we buýsanýaryn! Häzir meniň nähili bagtlydygymy hiç kim bilmez. Siz, madridliler bilen duşuşmaga sabyrsyzlyk bilen garaşýaryn we uly goldawyňyz üçin minnetdar”.
Şertnamanyň maliýe taraplary aýan edilmeýär, ýöne Sky Sports-yň maglumatlaryna görä, Mbappe salgytlardan soň ýylda 15 mln ýewro almak bilen, La Ligada Frenki De Ýongdan we Robert Lewandowskiden (ikisi-de “Barselonada” oýnaýar) soň üçünji iň köp hak alýan oýunçy bolar. Şeýle-de, gollar, kuboklar we beýlekiler üçin bonus hem göz öňünde tutulýar. 50 mln ýewro möçberde şertnama bonusy-da bar, ýöne töleg şertnamanyň ýyllaryna bölünýär.
Žurnalist Ramon Alwares has jikme-jik maglumatlary berýär: birinji möwsümde Mbappe 15 mln ýewro, ikinjide – 16,5 mln ýewro, üçünjide – 18 mln ýewro, dördünji we bäşinjide – 20 mln ýewro alar.
