31-nji maýda geçirilen Hökümet mejlisiniň barşynda wise-premýer B.Annamämmedow elektroenergetika pudagynyň maddy-enjamlaýyn binýadyny pugtalandyrmak boýunça geçirilýän çäreler barada döwlet Baştutanyna hasabat berdi.
Bellenilişi ýaly, döwlet Baştutanynyň tagallalary netijesinde ýurdumyzda täze gaz turbinaly we utgaşykly dolanyşykda işleýän elektrik stansiýalary, transformator beketleri hem-de elektrik geçirijiler gurulýar, hereket edýänleriniň durky täzelenilýär.
Bu desgalaryň kadaly işledilmegini üpjün etmek hem-de zerur bolan abatlaýyş işlerini geçirmek maksady bilen, Prezident Serdar Berdimuhamedowyň garamagyna degişli teklip hödürlenildi.
Döwlet Baştutany hasabaty diňläp, elektrik energiýasyny sarp edijileri ygtybarly we bökdençsiz üpjün etmek üçin elektrik stansiýalarynyň, beketleriň we elektrik geçirijileriň kadaly işlemeginiň zerur bolup durýandygyny belledi.
Şunuň bilen baglylykda, elektrik energetika pudagynyň maddy-enjamlaýyn binýadyny berkitmek boýunça teklibi goldap, Serdar Berdimuhamedow wise-premýere bu babatda anyk tabşyryklary berdi.
