Wenesiýa täze syýahatçylyk salgydynyň hereket eden ilkinji 11 gününde tas bir million ýewro gazandy. 5 ýewro möçberdäki salgyt şäheriň bir günlük myhmanlaryndan alynýar, bu Weneto sebitiniň ýaşaýjylaryna, talyplara we 14 ýaşa çenli çagalara degişli däldir diýip, Euronews habar berýär.
25-nji aprelden 5-nji maý aralygynda jemi 977,4 müň ýewrolyk 195 000 petek satyldy we bu häkimiýetleriň çaklamalaryndan ýokary boldy. Şeýle-de bolsa, heniz bu girdejiler 3 mln ýewro barabar onlaýn-bronirleme ulgamy, maglumat kampaniýasy üçin çykdajylary we beýleki çykdajylary ödemedi.
Maý aýynyň ahyryna çenli dowam etjek synag döwri tamamlanandan soň şähere baryp görmek üçin töleg günde 10 ýewro çenli artdyrylyp bilner. Tölemezlik üçin jerime 50 – 300 ýewro.
Salgyt girizilendigine garamazdan, Wenesiýanyň syýahatçylary azalmady, tersine, syýahatçylaryň sany geçen ýyllar bilen deňeşdirilende barha artýar. Şonuň üçin şäher geňeşiniň käbir agzalary bu çäräni şowsuz diýip hasapladylar.
Şäher geňeşiniň agzasy Jowanni Andrea 19-njy maýda Wenesiýa gelip görmek üçin 70 000 arzanyň hasaba alnandygyny belledi. Deňeşdirmek üçin: geçen ýyl 2-nji iýunda Respublikanyň gününde 65 000 myhman boldy.
Bir günlük syýahatçylar Wenesiýa gelip görmek üçin 8:30-dan 16:00-a çenli aralykda salgyt tölemeli. Muny şäheriň esasy awtobus we demirýol wokzallarynda, hem terminallarda, hem QR koduň üsti bilen edip bolar.
Geçen ýyl Wenesiýa syýahatçylyk akymy tas 20 mln adam boldy. Koronawirus pandemiýasyndan öň şähere ýylda 20 – 25 mln syýahatçy gelýärdi.
