TikTok dünýäniň dürli ýurtlaryndan 15 ýetginjekden ybarat “ýaşlar geňeşini” döretdi. Geňeş kompaniýa ýaş ulanyjylar bilen baglanyşykly howpsuzlyk we syýasat meseleleri boýunça maslahat berer. Bu barada gagadget.com habar berýär.
Geňeşiň döredilmegi TikTok-a gönükdirilen çagalaryň howpsuzlygyna abanýan töwekgelçilikler bilen baglanyşykly tankytlara jogap boldy. Tankytçylar, köplenç, ýaşlaryň howpsuzlygynyň bu programmany ulanmagyň netijesinde ýüze çykýan iň uly töwekgelçilikleriň biridigini belleýärler.
Geňeşiň döredilmegi TikTok-yň jemgyýetiň öňünde abraýyny ýokarlandyrmak we çagalaryň howpsuzlygyna ygrarlydygyny görkezmek synanyşygydyr.
Üstesine-de, häzir TikTok ByteDance kompaniýasyny ABŞ-da gadagan edilmezligi üçin programmany satmaga borçlandyrýan kanun taslamasyna garşy göreşýär. Ähtimal, kompaniýa ýetginjekleri çärelere garşy çykyş etmäge çekmegi göz öňünde tutýan bolmaly.
Geňeşiň wezipesi howpsuzlyk syýasaty we ýetginjeklere, köplenç, degişli bolan meseleler boýunça maslahatlary bermekden, programmada gizlinlik we howpsuzlyk resurslaryny üpjün edýän ýaşlar portalynyň funksiýalaryny maslahatlaşmakdan, şeýle-de Britaniýanyň Praesidio Safeguarding onlaýn-howpsuzlyk guramasy bilen hyzmatdaşlyk etmekden ybarat.
Geňeşiň agzalary zähmet hakyny alarlar.
Bellenilişi ýaly, TikTok-yň baş müdiri Şou Çu fewral aýynda geçirilen soňky duşuşyga gatnaşdy, şonda ýaşlar geňeşi TikTok-dan programmada hasaplaryň we blokirlemegiň işleýşi barada has giňişleýin maglumatlar bilen paýlaşmagy sorady.
TikTok ABŞ-da ýetginjekleriň arasynda giňden ýaýran programmalaryň biridir.
