Kot-d'Iwuar duşenbe gününe geçilen gije (Aşgabat wagty bilen) Kot-d'Iwuaryň paýtagty Abijan şäherindäki "Olimpik Alassan Uattara" stadionynda geçirilen Afrika milletleriniň kubogynyň finalynda Nigeriýany utdy.
Oýun 2:1 hasabynda ýaryşyň eýeleriniň peýdasyna tamamlandy. Şeýlelikde, Kot-d'Iwuaryň milli ýygyndysy Afrikanyň Kubogynyň taryhynda üçünji titulyna eýe boldy.
Duşuşygyň 38-nji minutynda hasaby Nigeriýanyň milli ýygyndysynyň goragçysy William Trost-Ekong açdy. Iwuarlylar 63-nji minutda ýarym goragçy Frank Kessýeniň kömegi bilen hasaby deňlediler. Ýeňiş goluny Kot-d'Iwuaryň hüjümçisi Sebastýan Aller tora girizdi (81-nji minut).
Ýaryş bäş şäherdäki (Abijan, Buake, Korogo, San-Pedro, Ýamusukro) alty stadionda geçirildi.
10-njy fewralda üçünji ýer üçin oýunda GAR penalti arkaly Kongo DR-nyň toparyny utdy - 0:0 (pen. 6:5).
