29-njy ýanwarda Gruziýanyň premýer-ministri Irakliý Garibaşwili wezipesinden gidýändigini mälim etdi diýip, BBC habar berdi.
"Toparymyz bilen ara alyp maslahatlaşan kararymyz barada halka habar bermek isleýärin, şu gün men premýer-ministr wezipesinden gidýärin" – diýip, Garibaşwili Tbilisidäki hökümet administrasiýasynda geçirilen metbugat ýygnagynda mälim etdi.
Gruziýanyň habar beriş serişdeleri bu karary 26-njy oktýabrda geçiriljek parlament saýlawlary bilen baglanyşdyrýarlar.
Kararyň dolandyryjy “Gruziýanyň arzuwy” partiýasynyň syýasy geňeşinde kabul edilendigi bellenilýär. Hökümet baştutanynyň wezipesini partiýanyň başlygy Irakliý Kobahidze alyp biler.
Garibaşwiliniň özi egindeşlerinden partiýa ýolbaşçylyk etmek teklibini alandygyny, onuň gurultaýynyň 1-nji fewralda geçiriljekdigini aýtdy. Toparyň indi täze wezipeler bilen ýüzbe-ýüz bolýandygyny, şonuň üçin “Gruziýanyň arzuwy”-nyň şu güýzde geçiriljek parlament saýlawlarynda “ynamly” ýeňşe taýyn bolmalydygyny aýtdy.
Irakliý Garibaşwili 2021-nji ýylyň fewralynda Gruziýanyň premýer-ministri wezipesine bellendi. Ondan öň ol bu wezipäni 2013–2015-nji ýyllar aralygynda eýeläpdi. Şol ýyllarda ol “Gruziýanyň arzuwy” partiýasynyň başlygydy.
