Kianu Riwz Lens Reddik adyndaky “Miras” baýragynyň ilkinji laureaty bolar. Bu baýrak “Saturn” baýragynyň gowşurylyş dabarasynda berler. Bu barada Ylmy fantastikanyň, fenteziniň we elhençlik filmleriniň akademiýasy yglan etdi diýip, daily.afisha.ru habar berýär.
“Bu baýrak ýerine ýetirijiniň diňe bir zehinini däl, eýsem onuň häsiýetini hem alamatlandyrýar we belleýär” – diýip, akademiýanyň prezidenti Robert Olgin we “Saturnyň” prodýuserleri Bredli we Kewin Markus aýdýar. Olar Riwzi “Golliwudyň ikonasy” hem “kiçigöwünliligiň we minnetdarlygyň aýdyň mysaly” diýip atlandyrdylar hem-de onuň öz muşdaklarynyň we kinematografçylaryň goldawyny hiç haçan ünssüz goýmandygyny bellediler.
Baýrak 2023-nji ýylyň mart aýynda 60 ýaşynda aradan çykan aktýor Lens Reddigiň hatyrasyna döredildi. Riwz onuň bilen bilelikde “Jon Uigiň” dört bölüminde oýnady. Şeýle-de, Reddik “The Wire”, “Fringe” filmleri, Horizon we Quantum Break oýunlary bilen hem tanalýar. Resmi wersiýa görä, onuň ölüminiň sebäbi ýürek keseli boldy.
