«Gremio» toparynyň urugwaýly hüjümçisi Luis Suares Braziliýanyň futbol boýunça çempionatynyň 2023-nji ýyldaky iň gowy oýunçy baýragyna mynasyp boldy.
36 ýaşly hüjümçi Braziliýanyň «Seriýa A» çempionatynyň iň üstünlikli oýunçysy boldy, ol 33 oýunda 17 pökgi geçirip, 11 ýardam pasyny berdi.
Möwsümiň ahyrynda «Gremio» 68 utuk toplap, Braziliýanyň çempionatynda ikinji ýeri eýeledi.
Suares ozal şertnamasy 2024-nji ýylyň ahyryna çenli dowam etse-de, «Gremiony» möwsümiň ahyrynda terk etjekdigini aýdypdy. Habar beriş serişdeleriniň habaryna görä, urugwaýly hüjümçi MLS-iň «Inter Maýami» toparyna geçer we «Barselonadaky» öňki topardaşy argentinaly Lionel Messi bilen täzeden bir toparda çykyş eder. Suares tomusda Messi we braziliýaly Neýmar bilen karýeralaryny bir toparda tamamlamak barada ylalaşandygyny habar beripdi.
