Milli Futbol Ligasynda (NFL) çykyş edýän amerikan futbolynyň “Dallas Kowboýz” kluby dünýäde iň gymmat sport franşizasydyr. Onuň bahasy 9 milliard dollar diýip bahalandyrylýar. Bu barada Forbes žurnaly dünýädäki iň gymmat klublarynyň ýyllyk sanawynda habar berýär.
Sanawyň lideri 2016-njy ýyldan bäri öňdeligi eýeläp gelýär. Ikinji orny beýsbolyň esasy ligasynda (MLB; 7,1 milliard dollar) oýnaýan “Nýu-Ýork Ýankiz” beýsbol kluby eýeledi. Üçünji orunda Milli basketbol birleşiginiň (NBA) “Golden Steýt” kluby we NFL-iň “Nýu Inglend Petriots” kluby (hersi 7 milliard dollar) durýar. Bäşinji orundan sekizinji orna çenli NFL-iň “Los Anželes Rems” (6,9 milliard dollar), “Nýu-Ýork Jaýants (6,8 milliard dollar), “Çikago Bears” (6,3 milliard dollar) we “Las Wegas Reýders” (6,2 milliard dollar) klublary eýeledi. “Nýu-Ýork Niks” (NBA) bilen “Nýu Ýork Jets” (NFL) hersi 6,1 milliard dollar bahasy bilen dokuzynjy orny paýlaşdy.
Ilkinji Ýewropa kluby Ispaniýanyň “Real”-y (11-nji ýer; 6,07 milliard dollar) boldy. Şeýle-de, iň gymmat futbol klublarynyň arasynda ilkinji üçlüge “Mançester Ýunaýted” (13-nji ýer; 6 milliard dollar), “Barselona” (18-nji ýer; 5,508 milliard dollar) girdi. “Formula 1” klasly ulaglaryň ýaryşy boýunça dünýä çempionatynyň toparlary bolan “Ferrari” (3,9 milliard dollar) we “Mersedes” (3,8 milliard dollar) degişlilikde 45-nji we 47-nji ýerde durýarlar. Sanawa NFL-iň 31 topary girdi, Milli hokkeý ligasynyň ýekeje topary hem ýok.
