Italiýaly hünärmen Roberto Mançini Saud Arabystanynyň milli ýygyndysynyň baş tälimçisi boldy. Bu barada toparyň «X» (öňki Twitter) sosial ulgamyndaky hasabynda habar berildi.
Şertnamanyň şertlerine görä, Mançini Saud Arabystanynyň milli ýygyndysyna 2026-njy ýyla çenli ýolbaşçylyk eder. Bar bolan maglumatlara görä, italýan hünärmeniniň aýlygy ýylda 20 million ýewro bolar.
«Men Ýewropada taryh ýazdym. Indi Saud Arabystany bilen taryh ýazmagyň wagty geldi» diýip, 58 ýaşly tälimçi wezipä bellenmegi mynasybetli düşürilen wideosynda aýtdy.
13-nji awgustda Mançini 2018-nji ýyldan bäri ýolbaşçylyk edip gelen Italiýanyň milli ýygyndysynyň baş tälimçisi wezipesinden aýryldy. Şol bir wagtyň özünde, hünärmen özüniň gitmeginde Italiýanyň Futbol federasiýasynyň prezidenti Gabriele Grawinany günäkärledi. Mançiniň ýolbaşçylygynda topar 2020-nji ýylda Ýewropanyň çempiony boldy we iki gezek UEFA Milletler ligasynyň kümüş medalyny gazandy.
Klub derejesinde Mançini Italiýanyň «Lazio», «Fiorentina» we «Inter» toparlaryny, şeýle hem Angliýanyň «Mançester Siti», Stambul şäheriniň «Galatasaraý» we Sankt-Peterburgyň «Zenit» toparlaryny türgenleşdirdi.
