«Mançester Siti» Angliýanyň premýer-ligasynyň (APL) üçünji tapgyrynda 3:1 hasabynda «Şeffild Ýunaýtedi» ýeňdi. «Şäherlileriň» baş tälimçisi Hosep Gwardiola üçin bu Angliýanyň çempionatynda 200-nji ýeňiş boldy diýip, «Sport-Express» habar berýär.
Ispaniýaly hünärmen bu ýeňişleri ýaryşyň taryhynda beýlekilerden has çalt gazandy. 200 ýeňiş üçin oňa 269 oýun ýeterlik boldy. Ondan öňki rekord APL-de 322 oýunda ilkinji 200 ýeňşini gazanan ser Aleks Fergýusona degişlidi.
«Siti» APL-de üç aýlawdan soň 9 utuk toplap, çempionatyň sanawynda birinji orny eýeleýär.
2022/23-nji möwsümde «Mançester Siti» trebl etdi – ýagny, «şäherliler» birbada üç kubok gazandylar. Olar Apl-de ýeňiji boldular, Angliýanyň kubogyny gazandylar, şeýle hem Çempionlar ligasynda ýeňiji boldular.
