Finlýandiýa eýýäm altynjy ýyl dünýäde iň bagly ýurt diýlip resmi taýdan ykrar edildi. Bu ýurt “2023-nji ýyldaky Bütindünýä bagt hasabatynda” görkezilen 137 ýurtdan ybarat sanawda birinji orny eýeledi. Bu barada Ginnesiň rekordlar kitabynyň saýty habar berýär.
Hasabatda ýaşaýyş hili, sosial goldaw we şahsy erkinlik ýaly görkezijiler göz öňünde tutuldy. Maglumatlaryň esasy çeşmesi bolup Gallup World Poll pikir soraşmasy hyzmat etdi, onuň dowamynda sorag edilýänlere birnäçe soraglara jogap berip, öz durmuşyna 0-dan 10-a çenli şkala boýunça baha bermek tabşyryldy. Her ýyl her ýurtdan 1000-e golaý jogap ýygnalýar.
Bu maglumatlary ulanyp, Bütindünýä bagt hasabaty her bir ýurda 0-dan 10-a çenli baha berdi, bu ýerde 0 – erbedi, 10 – gowyny aňladýar.
Finlýandiýanyň ahyrky netijesi 7,804 boldy. Ikinji we üçünji orunlary Daniýa (7,586) we Islandiýa (7,530) eýeledi. Ilkinji onluk şeýle görnüşde:
- Finlýandiýa (7,804);
- Daniýa (7,586);
- Islandiýa (7,530);
- Ysraýyl (7,473);
- Niderlandlar (7,403);
- Şwesiýa (7,395);
- Norwegiýa (7,315);
- Şweýsariýa (7,240);
- Lýuksemburg (7,228);
- Täze Zelandiýa (7,123).
Owganystan (1,859) we Liwan (2,392) pikir soraşmada iň bagtsyz iki ýurt boldy.
Finlýandiýa we onuň demirgazyk goňşulary Daniýa, Islandiýa, Şwesiýa we Norwegiýa sagdyn ömrüň dowamlylygy, korrupsiýa derejesiniň pesligi, sosial goldaw, jemgyýetiň sahylygy, jan başyna düşýän JIÖ we şahsy erkinlik ýaly faktorlar boýunça ýokary baha aldylar. Finlýandiýa netijeli, döwlet tarapyndan maliýeleşdirilýän saglygy goraýyş ulgamy, girdeji deňsizliginiň derejesiniň pesligi we ygtybarly hem elýeterli jemgyýetçilik ulag ulgamy ýaly birnäçe oňyn häsiýetler bilen beýleki ýurtlardan tapawutlanýar.
