Her ýylda bagbanlaryň arasynda geçirilýän “Ussat bagban” bäsleşiginiň jemleýji tapgyry boldy. Bu hünär bäsleşigi Türkmenistanyň Kärdeşler arkalaşyklarynyň Milli merkezi, Türkmenistanyň Oba hojalyk ministrligi we Türkmenistanyň Daşky gurşawy goramak ministrligi bilelikde geçirdi.
Bäsleşikde onuň welaýat tapgyrlarynda ýeňiji bolan bagbanlar ýaryşdylar.
Bäsleşik üç şert boýunça dowam etdi. Birinji şerte laýyklykda, bagbanlar Türkmenistanyň gözel tebigatyny, türkmen topragynda ýetişýän datly miweleri wasp etdiler.
Bäsleşigiň ikinji şertinde bolsa, bagbanlarda öz kärende we berkidilen ýerlerinde ýetişdirýän baglary barada wideoşekilleriň üsti bilen gürrüň berdiler. Şeýle hem köp ýyllarda toplan tejribelerini paýlaşdylar. “Ussat bagban” bäsleşiginiň soňky şertine laýyklykda, bagbanlar ýörite taýýarlanan sowalnamalar esasynda bagbançylyk hünäri, ekologiýa, tebigaty goramak baradaky soraglara jogap berdiler.
Gyzykly geçen bäsleşigiň netijesinde, eminler topary tarapyndan Mary welaýatynyň Baýramaly etrabynyň kärendeçisi Döwletjan Öwezmyradow Baş baýraga mynasyp görüldi.
Döwletjan Öwezmyradow 25 sotka mellek ýerinde hurma agajynyň ýüzden gowrak görnüşini ýetişdirýär. Her düýp hurma agajyndan 100-den 150 kilograma çenli hasyl alýar. Şeýle hem 50 düýp limon agajyny ýetişdirýär. Her düýp limon agajy 700-900 sany limon hasylyny getirýär.
Bäsleşige gatnaşyjylara Türkmenistanyň Prezidentiniň adyndan sowgatlar we Hormat hatlary gowşuryldy.
