Angliýanyň "Mançester Siti" futbol klubunyň baş tälimçisi Hosep Gwardiola Barselonadaky keselhanada gyssagly ýagdaýda arka oňurgadan edilen operasiýasyny üstünlikli geçirdi. Tälimçi şol sebäpli toparyň birnäçe oýnuny sypdyrmaly bolar. Bu barada iňlis klubunyň metbugat gullugy habar berdi.
Tälimçiniň halkara oýunlary üçin arakesmeden soň sentýabryň ortalarynda klubuň çägine gaýdyp gelmegine garaşylýar. Gwardiola ýok wagtynda onuň wezipelerini kömekçi Huanma Lilýo öz üstüne alar.
Gwardiola 2016-njy ýylyň tomsundan bäri “Mançester Sitä” ýolbaşçylyk edýär. Bu döwürde ol Angliýanyň çempionatynda bäş gezek, ýurduň kubogyny we Super kubogyny - hersini iki gezekden, dört gezek Angliýanyň ligasynyň kubogyny, Çempionlar ligasyny we UEFA Super kubogyny – hersini bir gezekden gazandy. Ondan öň ol nemes "Bawariýa"-syna we Ispaniýanyň "Barselona" toparyna tälim berdi. Umuman alanyňda, Gwardiolanyň 36 topar kubogy bar.
2022/23 möwsüminiň ahyrynda Gwardiola 31-nji awgustda geçiriljek Ýewropa Futbol Assosiasiýalary Bileleşiginiň (UEFA) ýylyň iň gowy tälimçisi adyna dalaşgär görkezildi.
