Hindistanyň «Çandraýan-3» awtomatiki planetaara stansiýasy Aý orbitasyndan aýlawyny tamamlady we Aýa düşmeziniň öň ýanyndaky soňky tapgyra - gonuş we hereketlendiriji modullarynyň bölünmegine taýýarlanýar. Bu barada Hindi kosmos gözleg guramasy (ISRO) habar berdi.
"Bu gün hereketlendirijiniň gysga möhletli işledilmegi “Çandraýan-3-i”, meýilleşdirilişi ýaly, 163 km-lik orbitada 153 kilometre çykardy. Şunlukda, onuň Aýa uçmak bilen bagly hereketleri tamamlandy" diýip, ISRO X (öňki Twitter) sosial ulgamynda ýazdy.
Kosmos gullugy: "Indi hereketlendirijili modul bilen gonuş moduly öz aýratyn uçuşlaryna taýynlyk görýärkä, awtomatiki stansiýanyň düşmegine taýýarlanmagyň wagty geldi" - diýdi. ISRO "gonuş modulynyň hereketlendirijili moduldan aýrylmaly wagtynyň 2023-nji ýylyň 17-nji awgustyna meýilleşdirilendigini" düşündirdi.
Ondan öň ISRO-nyň başlygy Şridhara Somanath “Çandraýan-3” -iň Ýeriň hemrasynyň üstüne gonmagynyň 23-nji awgustda meýilleşdirilendigini habar beripdi.
Hindi Aý missiýasyna 14-nji iýulda badalga berildi. Bu missiýa üstünlikli amal edilen ýagdaýynda, Hindistan (SSSR-den, ABŞ-dan we Hytaýdan soň) Aýda apparatyny gonduran dördünji ýurt bolar.
