Alymlar Ýerde ýaşap geçen iň agyr jandar diýen ada mynasyp bolup biljek gadymy kitiň galyndylaryny ýüze çykardylar. Bu barada lenta.ru «Nature» žurnalyndaky maglumatlara salgylanyp habar berýär.
Täze görnüş Perucetus colossus diýlip atlandyryldy, bu at sözme-söz terjime edilende «Perudaky ägirt uly kit» diýmekdir. Onuň galyndylary Perunyň günorta-gündogaryndaky Ika sebitinde ýerleşýän kert gaýaly eňňitden tapyldy. Bu ýerler gadymy döwürlerde deňziň düýbi eken, şonuň üçin hem bu ýerden deňiz jandarlarynyň daşa öwrülip giden galyndylary tapylýar.
Gadymy jandaryň 13 sany oňurga süňki, 4 sany gapyrgasy we but süňki tapyldy. Her oňurga süňküniň agramy 100 kilograma deňdir, gapyrgalaryň uzynlygy bolsa 1,4 metre ýetýär. Galyndylaryň ýaşy 39 million ýyl diýlip hasaplanýar. Tapylan süňkler häzirki deňiz jandarlarynyňky bilen deňeşdirilende, gadymy kitleriň agramynyň 85 – 340 tonna aralygynda bolandygy ýüze çykaryldy. Iň uly jandar hasaplanýan gök kitleriň agramy bolsa 180 tonna ýetýär. Gadymy kitiň uzynlygy 20 metre ýetipdir, käbir gök kitler bolsa 30 metre çenli ýetip bilýärler. Şeýlelikde, Perucetus colossus iň uly jandar bolmasa-da, iň agyr jandar bolupdyr. Muňa onuň gök kitiňkä görä has agyr we dykyz süňkleri mümkinçilik beripdir. Onuň, esasan, deňziň kenarýaka çäklerinde ýaşandygy çaklanylýar. Emma onuň kelleçanak süňki bolmazdan, nädip iýmitlenendigini bilmek kyn. Şonda-da, onuň ownuk deňiz jandarlary bilen iýmitlenendigi hakynda çaklamalar bar.
