Sport harytlaryny öndüriji Nike Inc. dördünji maliýe çärýeginde arassa girdejisini ep-esli azaltdy, görkeziji bazaryň çaklamasyndan ýaramaz boldy diýip, interfax.ru belleýär.
Kompaniýanyň metbugat gullugynda habar berlişi ýaly, 31-nji maýda tamamlanan çärýegiň jemi boýunça arassa girdeji geçen ýylyň degişli döwründäki 1,44 mlrd dollar ýa-da paý üçin 0,90 dollar bilen deňeşdirilende, 1,03 mlrd dollara ýa-da paý hasabynda 0,66 dollara çenli azaldy.
FactSet tarapyndan sorag edilen analitikler bu görkezijiniň paý üçin ortaça 0,68 dollar derejesinde bolmagyny çaklapdylar.
Nike-iň çärýek girdejisi 5%, 12,83 mlrd dollara çenli ýokarlandy. Puluň hümmetiniň üýtgemegini hasaba almazdan, görkeziji 8% ýokarlandy.
Hytaýda (Gonkongy, Makaony we Taýwany goşmak bilen) Nike-iň girdejisi kowide garşy çäklendirmeleriň ýatyrylmagy netijesinde 16%, 1,81 mlrd dollara çenli ýokarlandy. Demirgazyk Amerikada satuw 5% ýokarlanyp, 5,355 mlrd dollar boldy. Ýewropa, Ýakyn Gündogar we Afrika sebitlerinde girdeji 3%, 3,35 mlrd dollara, Aziýa-Ýuwaş umman sebitinde we Latyn Amerikasynda 1%, 1,7 mlrd dollara çenli ýokarlandy.
Umuman, 2023-nji maliýe ýylynyň jemi boýunça Nike-yň girdejisi 10% ýokarlanyp, 51,2 mlrd dollar, arassa girdejisi 16% peselip, 5,1 mlrd dollar boldy.
Täze maliýe ýylynda kompaniýa girdejiniň 4-6% ýokarlanmagyna garaşýar diýip, baş maliýe müdiri Mettýu Frend belledi.
