Latwiýanyň Seými (parlament) häzirki daşary işler ministri Edgars Rinkewiçsi ýurduň prezidenti saýlady. Bu barada TASS habar berýär.
“Çarşenbe güni, 31-nji maýda Seým Edgars Rinkewiçsi prezident saýlady. Saýlawlaryň üçünji tapgyrynda Rinkewiçsiň dalaşgärligini 52 deputat goldady, 35 deputat garşy boldy” – diýlip, Seýmiň saýtynda ýerleşdirilen beýanda aýdylýar.
“Meniň üçin Latwiýa Respublikasynyň prezidenti saýlanmagym uly hormat, men Latwiýanyň halkyna gowy hyzmat etmek üçin mümkin bolan ähli zady ederin. Men parlamentiň agzalaryna bildirilen ynam üçin minnetdar” – diýip, Rinkewiçs Twitterde belledi.
Latwiýanyň prezidenti Seýmiň deputatlarynyň sesleriniň aglaba köplügi bilen (100-den 51) dört ýyl möhlete saýlanýar. Ikinji ses berişligiň dowamynda Rinkewiçs 42 deputatyň, arhitektor, işewür we syýasatçy Uldis Pilens 25 deputatyň, jemgyýetçilik dolandyryşy boýunça hünärmen we Ýewropadaky Latwiýa diasporasynyň aktiwisti Elina Pinto 10 deputatyň goldawyna eýe boldy.
Rinkewiçs Latwiýanyň DIM-niň başlygy wezipesini 2011-nji ýyldan bäri eýeleýär.
