2022-nji ýylda dünýäde açlykdan ejir çekýän adamlaryň sany 828 mln adama barabar boldy diýip, FAO-nyň RF bilen aragatnaşyklar boýunça müdiri Oleg Kobýakow Ýewraziýanyň ykdysady forumynyň çäginde geçirilen “Agro-senagat toplumynyň häzirkizaman ösüş paradigmasy: global kynçylyklar, açylýan mümkinçilikler” sessiýasynda aýtdy. Bu barada interfax.ru habar berýär.
“Ýedi ýyl mundan ozal dünýä jemgyýetçiligi 2030-njy ýyla çenli durnukly ösüşi gazanmak borjuny öz üstüne alypdy we esasy maksatlaryň biri hökmünde 2030-njy ýyla çenli açlygy doly ýok etmek hem-de azyk howpsuzlygyny üpjün etmek bolupdy. Biz häzir nirede barýarys? Gynansak-da, soňky kowidden öňki ýylda, takmynan, 680 milliona barabar bolan dünýäde açlyk çekýän adamlaryň sany azalmady. FAO-nyň we onuň dünýäde azyk howpsuzlygy we iýmitlenme ýagdaýy barada her ýyl hasabat çykarýan hyzmatdaşlarynyň maglumatlaryna görä, geçen ýyl 828 mln adam açlykdan ejir çekdi” – diýip, ol belledi.
Onuň pikiriçe, iýul aýynyň ortalarynda hödürlenjek we baha beriji bölegi öz içine aljak täze hasabatda hem bu görkezijiler kän gowulaşmaz.
Onuň aýtmagyna görä, açlygy ýok etmek – bu wezipäniň diňe bir bölegi. Ikinjisi – ilaty doly derejeli iýmitlenme bilen üpjün etmek. “Häzirki wagtda dünýädäki 8 milliard adamdan 3 milliarddan gowragy sagdyn iýmitlenip bilmeýär” – diýip, ol habar berdi.
Kobýakow 2030-njy ýylda açlyk çekýän adamlaryň sany boýunça dünýäniň 2019-njy ýyldaky derejesinde bolup biljekdigini hem belledi.
