Irlandiýada alkogol önümlerine saglyga ýetjek zyýan, onkologiýa keselleriniň döreme töwekgelçiligi we bagra zyýan ýetmegi barada bellik girizildi. Bu barada kanuna Irlandiýanyň Saglygy goraýyş ministri Stiwen Donnelli gol çekdi. Ol Irlandiýanyň muny dünýäde ilkinji bolup ýola goýandygyny belledi. Bu barada rbc.ru habar berýär.
Kanun 2026-njy ýylyň 22-nji maýyndan başlap güýje girer, öndürijileriň we satyjylaryň öwrenişmegi üçin geçiş döwri göz öňünde tutuldy.
Kanun alkogol önümleriniň etiketkalarynda önümdäki kaloriýa mukdarynyň we alkogol gramynyň görkezilmegini göz öňünde tutýar. Mundan başga-da, çüýşelerde we gaplarda göwrelilik döwründe alkogol içmegiň howply taraplary, şeýle-de alkogol netijesinde bagyr keselleriniň we ölüm bilen gutarjak onkologiýa keselleriniň ýüze çykma howpy barada açyk duýduryşlar peýda bolar.
Şeýle bellikleriň pablarda we beýleki alkogoly içip boljak köpçülik ýerlerinde-de ulanylmagy göz öňünde tutulýar. Häzirki wagtda köp ýurtlarda şeýle duýduryşlar çilim gaplarynda ýerleşdirilýär.
Irlandiýada alkogol içgilerini içmegiň iň ýokary derejesi 2001-nji ýylda boldy, şonda bir adam ýylda ortaça 14,3 litr arassa alkogol içýärdi. Saglygy goraýyş pudagynda gözlegler boýunça geňeşiň maglumatlaryna görä, häzir bu görkeziji 10,2 litre çenli peseldi.
