1912-nji ýylda Demirgazyk Atlantikanyň suwlarynda gark bolan “Titanik” ýolagçy gämisiniň ilkinji sanly nusgasy Beýik Britaniýada döredildi. “The Times” gazetiniň habar bermegine görä, 700 müň töweregi fotografiýany öz içine alýan bu göwrümli taslama suwasty surata düşürmelere ýöriteleşen Magellan kompaniýasy tarapyndan amala aşyryldy diýip, TASS belleýär.
Uzak aralykdan dolandyrylýan suwasty enjamlaryň kömegi bilen kompaniýanyň hünärmenleri 111 ýyldan gowrak wagt bäri 3,8 km çuňlukda ýatan gäminiň 3D modelini döretdiler. Atlantic Productions telewizion kompaniýasy bilen hyzmatdaşlykda olar gäminiň korpusynyň örtüginden we ägirt perlerinden başlap, açylmadyk şampan çüýşelerine we heläkçiligiň bolan ýerinde zyňlyp ýatan onlarça jübüt aýakgaplara çenli ähli detallary ýokary durulykda surata düşürdiler.
Model “Titanigiň” iki bölegini-de – gämi döwlenden soň dürli traýektoriýa we tizlik bilen suwuň düýbüne çöken burun we yz tarapyny öz içine aldy, häzir bu bölekler biri-birinden 800 metr töweregi aralykda ýerleşýär.
Taslamanyň esasy maksady hökmünde awtorlar diňe bir gäminiň böleklerini jikme-jik öwrenmek däl-de, eýsem heläkçiligiň sebäplerine has gowy düşünmek üçin täze gözlegleri geçirmek mümkinçiligini belleýärler.
Belläp geçsek, “Titanigiň” heläkçilige uçramagynyň esasy sebäbi gara diýlip atlandyrylýan, ýagny düňderilen, hiç hili öwüşgini bolmadyk gara-gök reňkli aýsberg boldy diýlip hasaplanýar. Gäminiň bortunda 2 224 adam bardy, şolardan 1 513 adam öldi. Gäminiň bölekleri diňe 1985-nji ýylda tapyldy.
