2027-nji ýyla çenli iş bilen üpjün edijiler 69 mln iş ornuny döretmegi, 83 mln iş ornuny bolsa azaltmagy meýilleşdirýärler. Şeýle maglumatlar Bütindünýä Ykdysady Forumyň (BYF) 800-den gowrak kompaniýadan pikir soraşmanyň esasynda düzülen hasabatyndan gelip çykýar diýip, rbc.ru habar berýär.
Hasabatda iş orunlarynyň arassa ýitgisiniň 14 mln ýa-da häzirki işliligiň 2%-i boljakdygy aýdylýar. Iş orunlarynyň döredilmegine gaýtadan dikeldilýän energiýa çeşmelerine geçilmegi oňyn täsir eder, iş orunlarynyň azaldylmagyna bolsa ykdysady ösüşiň peselmegi we inflýasiýanyň ýokarlanmagy täsirini ýetirer.
Iş orunlarynyň sanyna emeli intellektiň ornaşdyrylmagy hem oňyn, hem ýaramaz täsir eder. BYF-yň çaklamasy boýunça, bir tarapdan, bu ugurda hünärmenleriň (maglumat analitikleri, maşyn bilimi we kiberhowpsuzlyk boýunça hünärmenler) işliligi bäş ýyldan ortaça 30% ýokarlanar. Beýleki bir tarapdan, mysal üçin, kätipler we maglumatlary girizmek bilen meşgullanýan işgärler öz iş orunlaryny ýitirerler – jemi 26 mln iş orny.
Häzirki wagtda emeli intellekt biznes bilen baglanyşykly ol ýa-da beýleki bir ýumuşlaryň 34%-ini ýerine ýetirýär. 2020-nji ýyl bilen deňeşdirilende, görkeziji sähel ýokarlandy. Pikir soraşmalara laýyklykda, 2027-nji ýyla çenli ýumuşlaryň 42%-i awtomatlaşdyrylar, 2020-nji ýylda bolsa bu görkezijiniň 2025-nji ýyla çenli 47%-e ýetmegine garaşylypdy.
