ChatGPT çat-botdan her aýda 100 milliondan gowrak işjeň ulanyjy peýdalandy. Bu görkeziji, Reýter agentliginiň hasaplamagyna görä, çatyň açylandan iki aý soň gazanyldy. Bu ýagdaý ChatGPT-i "sarp edijileriň taryhda iň çalt ösýän goşundysyna" öwürýär.
2023-nji ýylyň ýanwar aýynda özboluşly çat-bot ulanyjylarynyň sany 13 milliona ýetdi, bu 2022-nji ýylyň dekabryndakydan iki esse köpdür. Deňeşdirmek üçin UBS holdinginiň şweýsariýaly hünärmenleri şeýle maglumatlary mysal getirýär: şunuň ýaly görkezijä ýetmek üçin TikTok-a dokuz aý, Instagrama bolsa 2,5 ýyl gerek bolupdyr.
Emeli aňly ChatGPT çat-boty OpenAI tarapyndan işlenip taýýarlandy. Onuň demowersiýasy 2022-nji ýylyň noýabr aýynyň ahyrynda çykdy. EA tehnologiýalarynyň kömegi bilen ol dürli wezipeleri ýerine ýetirip bilýär: gözleg ýaly, islendik soraga diýen ýaly jogap tapyp, programma koduny ýazyp, goşgy düzüp ýa-da diplom işini ýazyp bilýär. Mysal üçin, Russiýanyň Döwlet Ynsanperwer Uniwersitetiniň talyby ChatGPT-iň kömegi bilen diplom işini ýazyp, ony «kanagatlanarly» baha bilen gorady.
Şeýle üstünlik Microsoft-yň ünsüni özüne çekdi. Ýanwar aýynda korporasiýa ChatGPT-ni Word redaktoryna we Bing gözlegine birleşdirip başlady. Soň bolsa kompaniýanyň wekilleri agzalan taslama maýa goýandyklary baradaky habarlary tassykladylar.
